Dithero tsa Tirelano mo Kutlwanong
Thero ka Sontaga wa bofelo morago ga Moletlo wa o o Borarobongwe, e le ka 20. 11. 2011 56/2011
MO LEINENG LA MODIMO O E LENG RARA LE MORWA LE MOWA O O BOITSHEPO!
1. Sefela sa 330 – 305/313
2. Thapelo: E rile MORENA a fetola tatlhego ya Sione, ra tshwana le ba ba lorang. Foo melomo ya rona e ne ya tlala setshego, le diteme tsa rona duduetso. Foo go ne go buiwa mo ditšhabeng go twe: MORENA o ba diretse dilo tse dikgolo. (Pes. 126:1-2. Amen.
3. Epistolo ka fa thulaganyong ya 2 e kwadilwe mo Tshenolong 21:1-7;
Efangele ka fa thulaganyong ya 1 e kwadilwe mo go Matheo 25:1-13.
4. A go ipolelwe tumelo ya bokeresete! 5. Sefela sa 284 – 266/272
6. Thapelo ya mmadi wa thero. 7. Efangele ka fa thulaganyong ya 3 e kwadilwe
mo go Luka 12:42-48, e re: “Morena a re: ‘Kana molebeledi yo o ikanyegang, yo o botlhale ke mang, yo morena wa gagwe o tla mo laodisang badiredi ba gagwe gore a ba abele dijo ka nako tsa teng? Go sego motlhanka yoo, yo e tla reng morena wa gagwe a tla, a mo fitlhele a dira jalo. Ammaaruri ke lo raya ke re: O tla mo laodisa tsotlhe tse o nang natso. Mme fa motlhanka yoo a ka ithaya a re: ‘Morena wa me o diega go tla,’ mme a simolola go betsa batlhanka le malata, le go ja le go nwa le go tagwa, morena wa motlhanka yoo o tla tla ka letsatsi le o sa mo lebelelang ka lone, le ka nako e o sa e itseng, mme o tla mo gagoganya, a mo naya kabelo ya gagwe le ba ba sa ikanyegeng. Motlhanka yo o itsileng thato ya morena wa gagwe, mme a se ka a baakanya sepe, le fa e le go dira ka fa thatong ya gagwe, o tla bediwa thata. Mme yo o se kang a itse, mme a dira tse di tshwanetseng kotlo, o tla bediwa go le gonnye. Mongwe le mongwe yo o neetsweng tse dintsi, go tla batlwa tse dintsi mo go ene; yo o filweng taolo mo go tse dintsi, go tla batlwa tse di fetisang mo go ene.’” Amen.
8. Thero: Baratwa mo Moreneng wa rona Jesu Keresete, kajeno ke Sontaga wa bofelo mo ngwageng wa kereke. Ka mafoko a mangwe re re: Ngwaga wa kereke e fela kajeno. Re a itse gore re fetile mo go tse dintsi, e le tse di molemo, le tse di bosula, tse di itumedisang, le tse di ledisang. Le fa go ntse jalo, Morena o re tshegeditse, go fitlhela mo letsatsing la kajeno. Re fetsa ngwaga ono ka go rwesiwa, le ka go thusiwa ke Morena. A re lebogeng Modimo ka ntlha ya tsotlhe tse o di re diretseng mo ngwageng ono o re o fetsang kajeno. Potso jaanong ke e: Ke eng se re se dirileng ka go itumedisa Modimo mo ngwageng ono. Aaraba potso eo ka nosi!
Kgang eo ya kgosi le batlhanka ya tsoletsa potso mo go Petoro. A gongwe o ne a gakgamadiwa ke morena yoo yo o diretseng batlhanka ba gagwe mo tafoleng. Potso ya gagwe e re: Morena, setshwantsho se a o se bolelela rona fela, gongwe botlhe? Karabo ya ga Jesu e phatsima sentle, fa a raya botlhe ba ba mo salang morago.
Tsala ya me mo Moreneng, Morena Jesu Keresete a re: Motlhanka yo a buang ka ga gagwe ke molebeledi, tiro e a e dirang ke ya morena wa gagwe. Go ntse jalo malebana le batho ba ba tlhokometseng tsa morena wa bone, jaaka dijo tse ba di tsholelang e le tsa morena wa bone. A re tlhokomeleng le rona ka nosi kajeno gore le rona re balebeledi kwa re leng teng, kwa re leng mo tirong, kwa re tsamayang teng, kwa re dirang teng. Ka sekao: Modimo o re file tseo, o re file gore re tlhokomele ka ntlha ya gagwe, re lebelele dikgang ka ntlha ya gagwe. A re nneng balebeledi, le batlhokomedi ba ba ikanyegileng, ba ba tlhaloganyang tiro. Ka bopelotlhomogi o tla re arabisa ka ntlha ya go tlhokomela ga rona gore re ne re tlhokomela tiro ya ona jang, re godisitse bana ba rona jang, re ba rutile jang ka tlotlego, re ba rutile jang go boifa le go rata Modimo. A re se ka ra tshwana le Eli yo o neng a palelwa ke go tlhokomela le go godisa bomorwawe ka tlotlego le tlotlomalo, a palelwa go nna molebeledi yo o ikanyegileng wa tlhaloganyo. A re se lebe ene fela, mme re itemoge ka nosi gore a re balebeledi ba ba ikanyegileng ba tlhaloganyo malebana le bana ba rona, madi, dijo, dithuo, magae a rona, le tse dingwe tse di ntseng jalo? Re ema kae, rona? Ka moo go bowa ga Jesu go lebagana le balebeledi ba ba ntseng jalo. Fa Jesu a bowa, a fitlhela molebeledi yo o dirileng ka go tlhokomela sentle tiro, o tla mo godisa, a mo laodisa tsotlhe tsa gagwe.
Tiragalo eo ke segopotso, fa re neilwe tsotlhe tse re nang natso gore re di tlhokomele. Paulo a re: O na le eng se o sa se newang? Mme fa o se neilwe, o ipokelang jaaka e kete ga o a se newa? 1 Kor. 4:7. Ke nnete. Ga go na sepe se e leng sa rona. Le rona ka nosi ga re ba rona. Re rekilwe ka tlhatlhwa e kgolo. Ka moo re tshwanetse go tlotla Modimo mo mebeleng ya rona. Tlhaloso ya artikele ya ntlha ya Kategisima e nnye e re: nna le wena re neilwe mmele, mowa, matlho, le dineo tsotlhe, tlhaloganyo le maikutlo otlhe, le gore Modimo o sa ntse o di boloka. Gape o re neile diaparo le ditlhako, dijo le dino, ntlo le lelapa, mosadi le bana, masimo le dikgomo, le dithoto tsotlhe. Ka moo re tshwanetse go o leboga, le go o tlotla, le go o direla, le go o utlwa. Tseo ke nnete ruri. Re nne badirisi ba methale ya bopelontle jwa Modimo. Tsotlhe tse ke nang natso di tswa mo bopelotlhomoging le mo loratong lwa Modimo. A ke nne molebeledi le modirisi yo o ikanyegileng wa tlhaloganyo mo dilong tsotlhe. A re lebeleng, re dirise tsotlhe tse re di filweng go di dirisa, re di dirise sentle ka go ikanyega le ka tlhaloganyo, le ka botlhale jo bo tswang mo Modimong. Jesu o tla tlhotlhomisa, fa a bowa gore re ne re di dirsia o ka re ka fa ka borona, gongwe re gopotse gore re tshwanetse go di dirisa ka fa thulaganyong ya gagwe. Kana re balebeledi le batlhokomedi ba ba mo tirong ya Modimo. Molebeledi le motlhokomedi yo o kgonang o bonala ka go ikanyega le ka go tlhaloganya.
Tota, morena wa me o diegile, fa go tlhaga kakanyo e e ntseng jalo mo pelong ya molebeledi, ke fa a simolola go tlhabana, le go betsa ba bangwe yo a nnang nabo. Gopola gore pelo e a tsietsa. Fa go buiwa ke basimane le basetsana seo, ke raya fa gare ga badiredi ba morena. Molebeledi yo o sa ikanyegang o ba bona, fa e le ba bannye fela ba a ba tlhokomelang, ke fa a ba tshwara ka bokete, ka seatla se se bokete. Molebeledi o tsenwa ke mowa wa go iitumedisa fela, o a ja, o a nwa. Ke se se rewang. Ke fa go tsena tshenyego, molebeledi o tsenwa ke mowa wa go ipatlela tse di molemo fela. Jesu a re: Yo o ntseng jalo o tla kgaolwa, le go latlhwa fela, a amogele kabelo ya gagwe mmogo le ba ba sa ikanyegeng, le ba ba sa tshepiweng.
Jesu a re: O tla bediwa thata ka dintho tse dintsi. Jesu o bua ka ga molebeledi yo o latlhwang. Gape go na le ba bangwe ba ba bediwang go le gonnye. Mongwe o tla bediwa thata, gonne ke yo o itseng thato ya Morena. Yo mongwe o tla bediwa go le gonnye, gonne ga a itse, le fa a fositse ka go sa itse. Fano Jesu ga a tlhalose gore go bediwa go raya eng. Se re se bonang ke fa batho ba sa tshwane botlhe. Bangwe ba abelwa bogolo go ba bangwe. Yo o abetsweng bogolo go tla batliwa tse dikgolo mo go ene. Botlhe ba tla tlhotlhomisiwa ka fa ba abetsweng ka teng. Kitso eo e tshwanetse go re boifisa, gonne go na le ba ba nang le dikabelo tse dikgolo fa gare ga rona. Gape go a diragala gore batho ba ipoke ka tse ba di abetsweng. Tota dingwe tsa dikabelo di a bonala fa pele ga batho. A re se ka ra lebala gore tsotlhe tse re nang le tsona le tsotlhe tse re leng tsona re di abetswe. Re tla tsena mo kotsing ya go ikgogomosa ka tsona. Gopola gore Modimo o emelana le ba ba ikgodisang, mme ba ba ikokobetsang ba tla amogela bopelotlhomogi.
Modimo o re diretse tse dintsi tse di molemo ka bopelontle la ka bopelonomi fela. Ga se gore re na le tshiamo le tshwanelo gore o re direle molemo mo go kalo. Go a diragala fela ka ntlha ya molemo o Modimo o di re abelang tsotlhe ka ona fela. Ka moo re tshwanetse go o leboga, le go tumdisa, le go direla, le go o utlwa.
A ke fetse ka gore: A matheke a lona a nne a tlamilwe, le dipone tsa lona di tuke! Amen.
9. Thapelo: Morena o re diretse tse dikgolo. A re itumeleng. Morena, re a kopa gore o re itshwarele tsotlhe tse re neng re sa ikanyege mo go tsona. O re fe ka bopelotlhomogi jwa gore re dirise tse o di re abetseng ka boikanyego jo bogolo. Amen. Thapelo ya Morena: Rara wa rona yo o mo legodimong …
10. Sefela sa 327 – 302/310
A kagiso ya Modimo e e fetang tlhaloganyo yotlhe e boloke dipelo tsa rona le maikutlo a rona mo go Keresete Jesu, Morena, Morepholosi. Amen. Thero eno e kwadilwe ke E. M. Mkhabela, ka ngwaga wa 2011.
Kgatiso le go rongwa ga dithero tseo go tshegediwa ke kopano e e bidiwang The Lutheran Heritage Foundation.
Wilhelm's space 