Jesus says: "I am the vine, you are the branches" and "Without me you can do nothing... abide in me"

Izintshumayelo zokuSebenzelana ekuZwaneni

Intshumayelo ngesonto elithiwa Jubilate, ka 15. 05. 2011                                                             28/2011

Egameni likaNkulunkulu onguYise, neNdodana, noMoya oNgcwele

 1.         Iculo 158/1

 2.         Umkhuleko: Nkosi Nkulunkulu, singcwelise ngeqiniso lakho. Izwi lakho liyiqiniso.  3.         Iphistola ngohlelo lwesibili lilotshiwe ku-1 Joh. 5:1-4;

Ivangeli ngohlelo lokuqala lilotshiwe kuJoh. 15:1-8.

 4.         Isivumo senkolo: Ngiyakholwa nguNkulunkulu uYise …

5. Iculo 122/105

 6. Umkhuleko wakhe ofundayo intshumayelo

7. Ivangeli ngohlelo lwesithathu lilotshiwe  uJohane 16, 16 – 23a, lithi: “Kusezakuba-yisikhashana ningabe nisangibona, kubuye kube-yisikhashana ningibone, ngokuba ngiya kuBaba. Ngakho abanye kubo abafundi bakhe base bekhuluma bodwa, bethi: Kuyini lokho akushoyo kithi ukuthi: Kusezakuba-yisikhashana ningabe nisangibona, kubuye kube-yisikhashana ningibone, nokuthi: Ngokuba ngiya kuBaba, na? Bathi: Kuyini lokho akushoyo ukuthi: Yisikhashana, na? Asazi ukuba uthini. UJesu wazi ukuthi bebethanda ukumbuza, wathi kubo: Niyabuzana ngalokho engikushiloyo ukuthi: Kusezakuba-yisikhashana ningabe nisangibona, kubuye kube-yisikhashana ningibone, na? Ngiqinisile, ngiqinisile ngithi kini: Niyakukhala nilile nina, kepha izwe liyakujabula; niyakuba-lusizi nina, kepha usizi lwenu luyakuphendulwa lube-ngukuthokoza. Owesifazane, nxa esabeletha, ulusizi, ngokuba sifikile isikhathi sakhe; kepha nxa esembelethile umntwana, akabe esakhumbula ubuhlungu ngenxa yentokozo yokuba kuzelwe umuntu ezweni. Nani-ke nilusizi manje, kepha ngiyakubuye nginibone, inhliziyo yenu ithokoze; intokozo yenu akakho onganamuka yona. Ngalolusuku aniyikubuza-lutho kimi.” Amen.

 8. Intshumayelo: Bandla likaJesu Kristu, namuhla sekulisonto, elinegama elihle elithi: Jubilate. NgesiZulu lithi: Mhubeleni njenjabulo! Namuhla siyalulekwa ngokuthi: Jabulani. Thokozani. Lelivangeli lifuna ukugcwalisa inhliziyo nomphefumulo nomoya nonembeza wethu ngentokozo. Lifuna ukugcwalisa umuzi wethu nebandla lethu nesigodi sethu sonke ngentokozo. Lapha phansi thina-makholwa sisengozini enkulu njalo yokulahlekelwa ithemba. Sidlula kokuningi, kakhulu ezweni lakithi, kakhulu esikhathini samanje. USathane uzama ngezindlela eziningi ukubulala isibindi sethu nentokozo yethu, ngoba ezama ukubulala ukukholwa kwethu. Ngakho-ke ngiyajabula ukuthi uMsindisi wami uJesu Kristu uqobo lwakhe uyangiduduza namuhla, njengokuba eduduza ibandla lakhe lonke emhlabeni.

 Uyakhuluma nabafundi bakhe kulobubusuku lapho akhashelwa khona, phambi kokufa kwakhe okwesabekayo. Ngalesosigcino senkulumo yakhe uyahlanganisa okuthathu: umkhosi wePhasika nomkhosi wePhentekoste nokubuya kwakhe ngosuku lokugcina, okusho ukuthi ukuvuka kwakhe nokuthululwa kukaMoya oNgcwele nokugcina kwezinto zonke lé kwelizayo. Kusezakuba-yisikhashana ningabe nisangibona, kubuye kube-yisikhashana ningibone, ngokuba ngiya kuBaba. Abafundi kabaqondi lutho, kanti kulula ukuthukulula lemfumbe. Abantwana bekilasi bayafunda: Ngiyakholwa nguJesu Kristu owabethelwa esiphambanweni, wafa, wembelwa… ngosuku lwesithathu wavuka kwabafileyo, wenyukela ezulwini, lapho ezothumela khona uMduduzi, uMoya wakhe oNgcwele, lapho eyakubuya khona. Kuyezwakala, kuyakhanya, angithi?

 Yebo, uJesu uyachasisela lokhu: Ngiqinisile, ngiqinisile ngithi kini: Niyakukhala nilile nina, kepha izwe liyakujabula; niyakuba-lusizi nina, kepha usizi lwenu luyakuphendulwa lube-ngukuthokoza. Nani-ke nilusizi manje, kepha ngiyakubuye nginibone, inhliziyo yenu ithokoze; intokozo yenu akakho onganamuka yona. Ngalolusuku aniyikubuza-lutho kimi.  Ubani phakathi kwethu odabukile namuhla na? Ubani phakathi kwethu unovalo na? UJesu uyakhuluma nani. Sengathi uJesu uyasibona thina, uyasazi thina, uyasiqonda thina nezinhlupheko zethu. Izinkinga zanamuhla ezweni lakithi ziyathinta inhliziyo yakhe. Akasishiyi siyizintandane. Akasishiyi osizini lwethu, cha. Uyasiphakamisa – umzimba nomphefumulo, ikhanda nenhliziyo. Sivama siphansi emoyeni kuzo izinsuku ezinzima. Kanti lapha evangelini lethu kuyadalwa okusha. Intokozo phakathi kwezinyembezi. Intokozo phakathi kokulila. Intokozo emuva kobuhlungu. Intokozo emva kokulimala. Intokozo entsha. Intokozo engenakuphela. Intokozo ephelele. Intokozo isibili. Ngiswela amazwi okubonisa nokuchaza okulotshiwe lapha namuhla.

Ngiyazi, ngikholwa nqi ukuthi uJesu Kristu ukhona. Unami ngosuku lonke. Unami emzini wami. Unami nalapha esontweni. Unami emini nasebusuku. Unami ezwini lakhe. Unami esibikweni. Unami esidlweni esingcwele. Unami ekamelweni lami. Unami esikoleni. Unami emsebenzini. Unami ngesonto ekuseni, naphakathi kweviki; noma ngikuphi, noma ngenzani, ngingasondela kuye, ngingahlangana naye. UMoya wakhe oNgcwele uyangithwala, uyangiqinisa, uyangiphilisa, uyangiduduza. Nina-ke bomame bebandla niyezwa kangcono okulotshiwe lapha: Owesifazane, nxa esabeletha, ulusizi, ngokuba sifikile isikhathi sakhe; kepha nxa esembelethile umntwana, akabe esakhumbula ubuhlungu ngenxa yentokozo yokuba kuzelwe umuntu ezweni. Lokhu kuyisibonelo esihle ngempela. Kuyadalwa okusha phakathi kobuhlungu ekuphileni kwethu. Kanjalo kuyadalwa okusha ekuhambeni kwethu. „Simelwe ukungena embusweni kaNkulunkulu ngezinhlupheko eziningi,“ (IzEnzo 14:22). Kanjalo kuyadalwa okusha ekuhambeni kwebandla leNkosi. Simlandela uJesu Kristu. Indlela yakhe idlula eGolgotha, igcina ezulwini kodwa. Nans’ impilo entsha ngokuvuka kukaKristu. Impilo entsha ngokuthululwa kukaMoya oNgcwele. Impilo entsha ngokukholwa. Impilo entsha ngokuthethelelwa kwezono zethu. Impilo entsha ngevangeli elihle elimnandi likaJesu Kristu. Phakathi kokufa sisempilweni. Emva kokufa kuvela ukuphila okungenakuphela, ukuphila okuphakade. Phakathi kosizi sisentokozweni. Owesifazane, nxa esabeletha, ulusizi, ngokuba sifikile isikhathi sakhe; kepha nxa esembelethile umntwana, akabe esakhumbula ubuhlungu ngenxa yentokozo yokuba kuzelwe umuntu ezweni. Emva kwezinhlupheko, emva kobuhlungu: intokozo engakhulumekiyo.

 Ukuvuka kukaKristu ngePhasika, ukuthululwa kukaMoya oNgcwele ngePhentekoste, ukubuya kukaKristu ngosuku lokugcina kuhlangene. Kuyaqinisa ukukholwa kwethu, kuyasikhombisa ukuthi izulu livuliwe phezu kwethu. Ngingajabula, ngingahlabelela njengenyoni endizayo. Engikushoyo bakithi: Wena nami singahleka phakathi kwezinyembezi. Nani-ke nilusizi manje, kepha ngiyakubuye nginibone, inhliziyo yenu ithokoze; intokozo yenu akakho onganamuka yona. Ngalolusuku aniyikubuza-lutho kimi. Konke ukungabaza kuzophela. Kukho okubi nobuhlungu, kuzo zonke izinhlupheko nezidingo, kulo lonke usizi ngiyazi nokho ukuthi uJesu Kristu uMsindisi wami ukhona. Uyangithanda. Uyangithwala. Uyangilondoloza. Ngiyezwa amazwi akhe enduduzo: Kusezakuba-yisikhashana ningibone; ngiyakubuye nginibone, inhliziyo yenu ithokoze, intokozo yenu akakho onganamuka yona. Bhekezela nje, mfowethu. Bhekezela nje, dadewethu. Bhekezela nje, mzalwane. Sizonqoba naye. Sizonqoba ngaye. Halleluja. Amen.

 9.         Umkhuleko:  Yebo, Nkosi Jesu Kristu, gcwalisa izinhliziyo zethu ngentokozo yakho nangethemba lakho nangesibindi sakho ukuba silwe ukulwa okuhle kokuholwa. Sisize kanjalo ukuba sikulandele ngobuqotho nangeqiniso size sisindiswe ngomusa wakho omkhulu enkazimulweni yokuphila okuphakade. Amen.

            Umkhuleko weNkosi: Baba wethu osezulwini …

10.       Iculo 115/97

Lentshumayelo ilotshiwe ngo-1993 ngu-Kurt-G. Tiedemann.

Ukucindezelwa nokuthunywa kwezintshumayelo kuyasekelwa yinhlangano ethiwa: Lutheran Heritage Foundation.