Jesus Christ says: "I am the good Shepherd"

Intshumayelo ngesonto elithiwa Misericordia Domini, ka 08. 05. 2011 27/2011

Egameni likaNkulunkulu onguYise, neNdodana, noMoya oNgcwele

1.         Iculo 195/193

 2.         Umkhuleko: Nkosi yethu, Jesu Kristu! Singcwelise ngeqiniso lakho, izwi lakho liyiqiniso. Amen.

3.         Iphistola ngohlelo lwesibili lilotshiwe ku 1 Petru 2:21b-25;

Ivangeli ngohlelo lokuqala lilotshiwe kuJohane 10:11-16.26-28.

4.              Isivumo senkolo: Ngiyakholwa nguNkulunkulu uYise …                                              5.               Iculo 298/337

6.     Umkhuleko wakhe ofundayo intshumayelo

7. Izwi lentshumayelo ngohlelo lwesithathu lilotshiw kuHesekeli 34:1-16.31, lithi: “Izwi likaJehova lafika kimi, lathi: Ndodana yomuntu, profetha ngabelusi bakwaIsrayeli; profetha uthi kubo, kubelusi: Isho kanje iNkosi uJehova, ithi: Wo kubelusi bakwaIsrayeli abazibonelela bone! Abelusi bebengayikuzalusa izimvu na? Niyadla amanoni, nembatha uboya, nihlaba ezikhulupheleyo, kepha izimvu anizalusi. Ezibuthakathaka aniziqinisanga, negulayo aniyiphilisanga, neyaphukileyo aniyibophanga, nexoshiweyo aniyibuyisanga, nelahlekileyo aniyifunanga, kepha nizibusile ngamandla alukhuni. Zazihlakazekile, ngokuba umalusi wayengekho; zaba-ngukudla kwazo zonke izilwane zasendle, zahlakazeka. Izimvu zami zazulazula kuzo zonke izintaba nakuwo onke amagquma aphakemeyo, yebo, izimvu zami zazihlakazekele ebusweni bonke bomhlaba, akwabakho ozifunayo nozicingayo. Ngalokho, belusi, zwanini izwi likaJehova lokuthi: Kuphila kwami, isho iNkosi uJehova, impela ngenxa yokuba izimvu zami zaba-yimpango, nangokuba izimvu zami zaba-ngukudla kwazo zonke izilwane zasendle, lokhu umalusi engekho, nangokuba abelusi bami bengafunanga izimvu zami, abelusi bezibonelela bona, bengazalusi izimvu zami, ngalokho, belusi, zwanini izwi likaJehova lokuthi: Isho kanje iNkosi uJehova, ithi: Bhekani, ngimelene, nabelusi, ngiyakuzibiza izimvu zami esandleni sabo, ngenze ukuba bangabe besazalusa izimvu, abelusi bangabe besazibonelela bona, ngophule izimvu zami emlonyeni wabo, zingabi-ngukudla kwabo. Ngokuba isho kanje iNkosi uJehova, ithi: Bhekani, mina ngiyakuzifuna izimvu zami, ngizicinge. Njengomalusi efuna umhlambi wakhe mhla ephakathi kwezimvu zakhe ezilahlekileyo, kanjalo ngiyakufuna izimvu zami, ngizophule kuzo zonke izindawo ezihlakazekele kuzo ngosuku lwamafu nolobumnyama. Ngiyakuzikhipha kubantu, ngiziqoqe emazweni, ngiziyise ezweni lazo, ngizaluse ezintabeni zakwaIsrayeli, ngasemifuleni, nasezindaweni zonke ezakhiweyo zezwe. Ngiyakuzalusela emadlelweni amahle, isibaya sazo sibe-sezintabeni zempakama yakwaIsrayeli; ziyakubuthisa khona esibayeni esihle, ziklabe emadlelweni aluhlaza ezintabeni zakwaIsrayeli. Mina ngiyakuzalusa izimvu zami, ngenze ukuba zibuthise, isho iNkosi uJehova. Ngiyakufuna ezilahlekileyo, ngibuyise ezixoshiweyo, ngibophe ezaphukileyo, ngiqinise ezigulayo; kepha ezikhulupheleyo nezinamandla ngiyakuzichitha, ngizaluse ngokwehlulela. … Nina niyizimvu zami, niyizimvu zedlelo lami; ningabantu, mina nginguNkulunkulu wenu, isho iNkosi uJehova.” Amen.

8. Intshumayelo: Bandla leNkosi, isonto loMalusi omuhle: ngesiLatini: Miserikordia Domini, njengokuba sizwile. Sinenhlanhla thina-makholwa, sinomholi, asisodwa. Ukhona umalusi, osigada. Amehlo akhe aphezu kwethu. Uyasiqondisa ngezwi lakhe: Umthetho nevangeli. Uyasixwayisa ezingozini; uyasiduduza ekudabukeni. Umthetho uyasigada, ivangeli liyasiphakamisa. Lelithekisi lanamuhla liyasithinta sonke, kakhulu thina-bafundisi. Liyasihlola; liyasihlaba; liyasivusa ebuthongweni; liyalola unembezea wethu; liyasithumela ebandleni nasesabelweni nasemadolobheni nomaphi lapho izimvu zeNkosi zihlala khona. Ngiyafeza umsebenzi wami ngokukhuthala nangesineke, na? Ngiyasebenza phansi kwamehlo oMalusi wezulu omkhulu ngothando olufanele nangokubekezela, na? Ngiyakwenza engingakwenza maqondana neziphiwo zami, maqondana nokuhlakanipha kwami, maqondana nesikhathi sami, na? Thina sonke siyabizwa, siyabuzwa namuhla. Sibahambela abavilaphaya nabahlubukileyo, na? Sibamema abayiziboshwa, sibakhulekela abagulayo nabafelwa nabadabukileyo, na?

Ngimsiza kanjani umakhelwane wami ongakholwayo, ongasontiyo, na? Ake sikhumbule njalo: Angingumnini womhlambi, nguNkulunkulu kuphela. Isikhundla sami sivela kuye. Angithi, siyezwa ukuthi lelizwi likaNkulunkulu lanamuhla liyathinta nabo bonke abanye abasebenza nabantu, ngisho othisha, nabantu bakaHulumeni, nasemahovisini, namaphoyisa, nezinduna, namakhosi, odokotela nabo bonke abasebenza ezibhedlela namaclinic lapha nalapha, amasocial workers nabo abasebenza ematilongweni ethu, size sifike ekhaya emzini wethu, lapho abazali, ubaba nomame bayelusa umhlambi wabo omncane, ngisho abantwana bethu, nabantwana babo. Izwi likaNkulunkulu liyema phambi kwami namuhla ekuseni, liyangihlola, liyangibuza mina, lithi: We, sibanibani ungumalusi onjani wena, na? uyazithanda wena noma uyazithanda izimvu zakho, na? Uyazinakekela zona, uyazigada, uyaziyisa emadlelweni aluhlaza, uyazikhombisa imithombo yamanzi aphilayo, okuphumula nokusutha, noma uyazidukisa zona ezingozini, ekukholweni okuyize, ekudangaleni, nakokunye okulihlazo namanyala amakhulu, ekubhujisweni nasekufeni na?

Sinomsebenzi munye kuphela njengabelusi ukuba sibakhombise, sibaphelekezele abanye endleleni yokuya ezulwini. Angithi, uma sizihlosisa kanjalo, sibuza lemibuzo, simelwe ukuphendula ngamahloni nangokudabuka, sithi: Asifanele, Nkosi. Asifanele, malusi wabelusi. Siyavilapha, siyazozela, siyazithanda, siyazibonelela, siyaphutha, siyona. Kuyaklebula inhliziyo uma sibona okwenziwa ezweni lakithi. Lelizwi likaNkulunkulu lanamuhla liyakhuluma kakhulu nababusi bethu, amalungelo abo nezimfanelo zabo. Isizwe esizama ukuqhubeka ngaphandle kukaNkulunkulu sizodideka, sizoduka, sizogcina kabi, sizobhubha. Kwakunjalo ngesikhathi esidlule, kusenjalo namanje, kuzoba kanjalo nakusasa. Kuyaklebula inhliziyo uma sibona okwenziwa ezikoleni zethu ezithize lapha nalapha. Singathi: UHezekeli uyasazi thina, uyabona esikwenzayo. Izwi likaJehova lafika kimi, lathi: Ndodana yomuntu, profetha ngabelusi bakwaIsrayeli; profetha uthi kubo, kubelusi: Isho njalo iNkosi uJehova, ithi: Wo kubelusi bakwaIsrayeli abazibonelela bona! Abelusi bebengayikuzalusa izimvu, na? Niyadla amanoni, nembatha uboya, nihlaba ezikhulupheleyo, kepha izimvu anizalusi. Ezibuthakathaka aniziqinisanga, negulayo aniyiphilisanga, neyaphukileyo  aniyibophanga, nexoshiweyo aniyibuyisanga, nelahlekileyo aniyifunanga, kepha nizibusile ngamandla alukhuni. Zazihlakazekile, ngokuba umalusi wayengekho; zaba-ngukudla kwazo zonke izilwane zasendle, zahlakazeka. Izimvu zami zazulazula kuzo zonke izintaba nakuwo onke amagquma aphakemeyo, yebo, izimvu zami zazihlakazekele ebusweni bonke bomhlaba, akwabakho ozifunayo nozicingayo.

Kumyalelo wokuqala siyafunda: Asomesaba, simthande, simethembe uNkulunkulu phezu kwezinto zonke. Omesaba uNkulunkulu akabesabi abantu. Omthanda yena, uzothanda nabantu bakhe. Omethemba uNkululunkulu uzosebenza ngokuthembeka okukhulu. Ukukholwa kunjalo. Kunezithelo; kunomphumela; kunempetho; kunomgomo. Maye kithina, uma sizama ukwelusa ngaphandle koMalusi wemiphefumulo yethu omkhulu! Ngalokhu, belusi, zwanini izwi likaJehova lokuthi: Kuphila kwami, isho iNkosi uJehova, impela ngenxa yokuba izimvu zami zaba-yimpango, nangokuba izimvu zami zaba-ngukudla kwazo zonke izilwane zasendle, lokhu umalusi engekho, nangokuba abelusi bami bengafunanga izimvu zami, abelusi bezibonelela bona, bengazalusi izimvu zami, ngalokho, belusi, zwanini izwi likaJehova lokuthi: Isho kanje iNkosi uJehova, ithi: Bhekani, ngimelene nabelusi, ngiyakuzibiza izimvu zami esandleni sabo, ngenze ukuba bangabe besazalusa izimvu, abelusi bangabe besazibonelela bona, ngophule izimvu zami emlonyeni wabo, zingabi-ngukudla kwabo.

Ngokuba isho kanje iNkosi uJehova, ithi: Bhekani, mina ngiyakuzifuna izimvu zami, ngizigcinge. Njengomalusi efuna umhlambi wakhe mhla ephakathi kwezimvu zakhe ezilahlekileyo, kanjalo ngiyakufuna izimvu zami, ngizophule kuzo zonke izindawo ezihlakazekele kuzo ngosuku lwamafu nolobumnyama. Ngiyakuzikhipha kubantu, ngiziqoqe emazweni, ngiziyise ezweni lazo, ngizaluse ezintabeni zakwaIsrayeli, ngasemifuleni, nasezindaweni zonke ezakhiweyo zezwe. Ngiyakuzalusela emadlelweni amahle, isibaya sazo sibe-sezintabeni zempakama yakwaIsrayeli; ziyakubuthisa khona esibayeni esihle, ziklabe emadlelweni aluhlaza ezintabeni zakwaIsrayeli. Mina ngiyakuzalusa izimvu zami, ngenze ukuba zibuthise, isho iNkosi uJehova. Ngiyakufuna ezilahlekileyo, ngibuyise ezixoshiweyo, ngibophe ezaphukileyo, ngiqinise ezigulayo; kepha ezikhulupheleyo nezinamandla ngiyakuzichitha, ngizaluse ngokwahlulela.

Siyezwa yilokhu na? Mina ngiyakwenza konke lokhu, isho iNkosi uJehova. Okusho ukuthi akuyi ngokuzama kwethu, akuyi ngokwentando yethu nangamandla ethu. Kepha makabongwe yena, konke kuya ngokwentando kaJehova. Yena kuphela uyiNkosi yomhlambi wakhe. Wamthumela uMalusi wakhe omuhle phakathi kwethu, iNdodana yakhe ethandekayo uJesu Kristu. 1 Pet. 2:21: Ngokuba nabizelwa khona lokho; ngokuba uKristu wahlushwa ngenxa yenu, enishiyela isibonelo sokuba nilandele ezinyathelweni zakhe. Siyakubonga, Nkosi Kristu. Sihawukele, Nkosi Kristu.

Ngalawomazwi kuyabonakala ukuthi uMelusi wethu omuhle uyamema izinsizwa ezithi azitholi umsebenzi, noma ziqedlie isikolo kahle ukuba kube khona abamlandelayo emsebenzini wakhe wokuba ngabelusi emhlambini woMelusi omuhle, ziye ekholishi ukuzilungisela umsebenzi wokwelusa umhlambi wezimvu zoMelusi wethu omuhle owazinikela ekufeni ngenxa yethu. Yiso isimemezelo esikhulu ngesonto loMelusi omuhle nakulomnyaka nakulesosikhathi sokuswela abafundisi ezindaweni eziningi ekerikeni lakithi. Amen.

9.         Umkhuleko: Nkosi, Nkulunkulu Baba, siyakubonga ngokuba usiphile uMalusi wethu omuhle uJesu Kristu. Nkosi, busisa abelusi bethu, ubalondoloze. Usiphe amadoda namakhosikazi aqotho athembekileyo akwesabe wena, akwazi wena, akulandele wena ukuba sihambisane kahle ezweni lakithi, sizwane kahle emabandleni ethu, siqhubeke kahle ezikoleni zethu, sihlalisane kahle emakhaya ethu, yebo, silekelelane yokuya ezulwini, sihloniphane endleleni, umzimba nomphefumulo, sibe-yizibonelo ezinhle zabantwana bethu, noma siyizoni, ngaye uJesu Kristu uMsindisi wethu, singakhohlwa ukuvuselela abafana bethu ukuzinikela ukuzilungisela umsebenzi wokwelusa ibandla, sonke sicele njalo ukuba iNkosi ithume izisebenzi ekuvuneni kwayo. Amen.

Umkhuleko weNkosi: Baba wethu osezulwini …

10.        Iculo 205/301

Ukuthula kukaNkulunkulu odlula ukuqonda konke makulondoloze izinhliziyo zethu nemicabango yethu kuKristu  Jesu, iNkosi noMsindisi wethu. Amen.

Lentshumayelo ilotshiwe ngomnyaka ka-2004 ngu-K. G. Tiedemann

Ukucindezelwa nokuthunywa kwalezintshumayelo kuyasekelwa yinhlangno ethiwa: Lutheran Heritage Foundation