Jesus Christ says: I am the Good Shepherd ...

Thero ka Sontaga o o bidiwang Miserikordia Domini, e le ka 08. 05. 2011 27/2011

Mo leineng la Modimo o e leng Rara le Morwa le Mowa o o Boitshepo!

 1.             Sefela sa 219 – 204/213

2.             Thapelo: Morena wa rona Jesu Keresete, o re itshepise mo boammaaruring! Lefoko la gago ke la boammaaruri. Amen.

3.             Epistolo ka fa thulaganyong ya 2 e kwadilwe mo go 1 Petoro 2:21b-25;

Efangele ka fa thulaganyong ya 1 e kwadilwe mo go Johane 10:11-16:27-30.

4.             A go ipolelwe tumelo ya bokeresete!                           5. Sefela sa 207 – 191/200

6.Thapelo ya mmadi wa thero.    7. Lefoko la thero ka fa thulaganyong ya 3 le kwadilwe o go Hesekiele 34:1-16. 31, le re: “Lefoko la MORENA la ba la tla kwa go nna la re: ‘Morwa motho, rera o kgalemele badisa ba Iseraele, rera ò ba ree o re: ‘Lona Badisa, Morena Modimo o bua jaana, a re: A tatlhego wee ya badisa ba Iseraele ba ba iphudisang! Badisa a ga ba a tshwanela go fudisa letsomane? Lo ja mašwi, lo apara boboa, lo tlhaba tse di nonneng, mme letsomane ga lo le fudise. Tse di fokolang ga lo a ka lwa di tiisa; tse di lwalang ga lo a ka lwa di alafa; tse di robegileng ga lo a ka lwa di fapa; tse di lelekilweng ga lo a ka lwa di busa; tse di timetseng ga lo a ka lwa di batla; mme tse di tiileng lwa di gataka ka kgatelelo. Dinku tsa me tsa phatlalala jalo ka go tlhoka modisa, tsa nna dijo tsa dibata tsotlhe tsa naga ka go phatlalala. Dinku tsa me tsa kgarakgatshega mo dithabeng tsotlhe le mo mebotong yotlhe e e godimo. Dinku tsa me tsa falalediwa kwa ntlheng tsotlhe tsa lefatshe, go se na yo o di tlhokomelang, le fa e le yo o di batlang. Ka moo, lona badisa, utlwang lefoko la MORENA! Morena Modimo o bua, a re: ‘Ruri! Ka botshelo jwa me! Dinku tsa me di fetogile thopo, dinku tsa me ke dijo tsa dibata tsotlhe tsa naga ka go tlhoka modisa; badisa ba me ga ba a ka ba tlhokomela dinku tsa me – kana badisa ba ne ba iphudisa fela, ba sa fudise letsomane la me. Ka moo he, lona badisa, utlwang Lefoko la MORENA!’ Morena Modimo o bua jaana, o a re: Bonang, ke tla wela badisa bao, ke batla dinku tsa me mo diatleng tsa bone, mme bone ke tla ba ntsha mo tirong ya go disa dinku tsa me. Badisa bao ga ba nke ba tlhola ba iphudisa ka bosi. Ke tla namola dinku tsa me mo maganong a bone gore di se ka tsa tlhola di nna dijo tsa bone.’ ‘Gonne Morena Modimo o bua jaana, o a re: ‘Bonang, ke tla batla dinku tsa me ka nosi, ke di tlamela. Modisa o tlhokomela letsomane la gagwe ka letsatsi le ka lone a leng mo gare ga dinku tsa gagwe tse di neng di phatlaletse, ke tla tlhokomela dinku tsa me jalo, ke di pholosa mo mafelong otlhe kwa di phatlalaletseng teng ka letsatsi la maru le lefifi. Ke tla di ntsha mo merafeng, ke di phutha mo mafatsheng, ke di isa kwa nageng ya tsona, ke di fudisa mo dithabeng tsa Iseraele le mo melapong le gotlhe fa di ka nnang teng mo lefatsheng leo. Ke tla di fudisa mo mafulong a a molemo; meraka ya tsona e tla nna mo dithabeng tse di godimo tsa Iseraele. Di tla botha teng mo marakeng a a molemo, di fula mafulo a manana mo dithabeng tsa Iseraele. Ke tla fudisa dinku tsa me ka nosi, ke di bothisa ka nosi, go bua Morena Modimo. ‘Ke tla batla tse di timetseng, ke busa tse di lelekilweng, ke fapa tse di robegileng, ke tiisa tse di lwalang, ke disa tse di akotseng le tse di tiileng, ke di fudisa ka tshwanelo. … ‘Lona lo dinku tsa me, lo dinku tse ke di fudisang; lo batho, mme nna ke Modimo wa lona,’ go bua Morena Modimo.” Amen.

8. Thero: Phuthego ya Morena, ke Sontaga wa Modisa yo o molemo. Ka Selatini ke Miserikordia Domini, jaaka re utlwile. Ka Setswana ke bopelontle la Morena. Rona badumedi re na le letlhogonolo. Re na le moeta-pele, ga re rosi. Go na le Modisa yo o re disang. Matlho a gagwe a mo godimo ga rona. O re lemosa ka Lefoko la gagwe, ka molao le Efangele. O re tlhagisa fa dikotsi di leng teng. O re gomotsa mo dikhutsafalong. Molao o a re disa. Efangele e a re godisa. Lefoko la thero ya kajeno le re ama rotlhe, bogolo rona baruti. Le a re tlhatlhoba, le a re tlhaba, le re tsosa mo thobalong, le lotsa segakolodi sa rona, le re romela mo phuthegong, mo mafelong a a kwa ntle, le mo ditoropong, le fa e le mo mafelong a mangwe kwa dinku tsa Morena di agileng teng. Le a mpotsa gore a ke dira tiro ya me ka tlhoafalo le ka tlhokomelo? A ke dira ka fa tlase ga matlho a Modimo yo mogolo wa legodimo ka lorato le boitshoko jo bo tshwanetseng? A ke dira tse ke kgonang go di dira ka fa dimphong tsa me, ka fa botlhaleng jwa me, ka fa nakong e ke nang nayo? Rotlhe re a bidiwa, re bodiwa kajeno. A re tsamaela ditshwakga le baikepi? A re laletsa ba ba kgaotsweng? A re rapelela balwetsi, baswagadi, batlholagadi, le ba ba hutsafetseng?

Re thusa mokaulengwe yo o sa dumeleng, yo o sa tseneng kereke jang? A re gopoleng ka metlha gore ga re beng ba letsomane. Mong le Morena wa lona ke Modimo fela. Boemo jwa rona bo tswa mo go ona. Ke re: Lefoko le la Modimo la thero ya kajeno le ama le botlhe ba ba dirang le batho, ke raya barutabana, batho ba goromente, ba dikantoro, maphodisa, barena, dikgosi, dingaka, le botlhe ba ba dirang mo dipetleleng, mo maokelong a magolo le a mannye, batlhokomedi ba batsofe, le ba ba bokoa, ba ba dirang mo dikgolegong. Re bue le ka ga magae a rona, kwa batsadi, borre le bomme, ba disang teng letsongwana la bone, ke raya bana, le bana ba bana, le ditlhogolo. Lefoko la Modimo la thero ya kajeno le utlwala mo mosong ono, le a ntlhatlhoba, le a mpotsa, le re: Motho ke wena, wena o modisa yo o ntseng jang? A wena o a ithata fela, gongwe o rata le dinku tsa gago, tse e leng tsa Modimo tota? A o a di tlhokomela? A o a di disa? A o di isa mo mafulong a matalana? A o di gogela mo motsweding wa metsi a botshelo, a o di lapolosa, a o di kgorisa sentle, gongwe o a di timetsa, o di isa mo dikotsing, mo tumelong e e timetsang, e e lapisang fela, gongwe mo makgapheng a a tlhabisang ditlhong go feta, mo tatlhegong le mo losong?

Re na le tiro e le nngwe fela, re le badisa gore re bontshe ba bangwe thato ya Modimo, re ba felegetse mo tseleng e e yang mo legodimong. Ke re: Fa re itlhatlhoba jalo, fa re botsa dipotso tseo, re tshwanetse go araba fa pele ga Modimo, re tlhabilwe ke ditlhong, re arabe le ka khutsafalo, re re: Ga re a tshwanela, Morena, ga re a tshwanela, Modisa  wa badisa, ra tshwakgafala, ra otsela, ra ithata, ra ipatlela, ra fosa, ra leofa. Go gagola pelo, fa re leba tse di diragalang mo lefatsheng la rona. Lefoko le la Modimo la thero ya kajeno le bua thata ka babusi ba rona, ka ga ditshiamelo le ka ga ditiro tsa bone. Morafe o o lekang go tswelela kwa ntle ga Modimo o tla tlhaela, o timele, o latlhege, o senyege. Go ne go ntse fela jalo mo sebakeng se se fetileng, go sa ntse go ntse fela jalo jaanong, go tla nna jalo kamamoso. Go gagola pelo, fa re bona tse di diragalang mo dikoleng dingwe tsa rona kwa le kwa. Re ka re: Moporofeti Hesekiele o a re itse, o bona tse re di dirang, a re: “Lefoko la MORENA la ba la tla kwa go nna la re: ‘Morwa motho, rera o kgalemele badisa ba Iseraele, rera ò ba ree o re: ‘Lona Badisa, Morena Modimo o bua jaana, a re: A tatlhego wee ya badisa ba Iseraele ba ba iphudisang! Badisa a ga ba a tshwanela go fudisa letsomane? Lo ja mašwi, lo apara boboa, lo tlhaba tse di nonneng, mme letsomane ga lo le fudise. Tse di fokolang ga lo a ka lwa di tiisa; tse di lwalang ga lo a ka lwa di alafa; tse di robegileng ga lo a ka lwa di fapa; tse di lelekilweng ga lo a ka lwa di busa; tse di timetseng ga lo a ka lwa di batla; mme tse di tiileng lwa di gataka ka kgatelelo. Dinku tsa me tsa phatlalala jalo ka go tlhoka modisa, tsa nna dijo tsa dibata tsotlhe tsa naga ka go phatlalala. Dinku tsa me tsa kgarakgatshega mo dithabeng tsotlhe le mo mebotong yotlhe e e godimo. Dinku tsa me tsa falalediwa kwa ntlheng tsotlhe tsa lefatshe, go se na yo o di tlhokomelang, le fa e le yo o di batlang.”

Ka taolo ya ntlha re ithuta gore “re tshwanetse go boifa, le go rata, le go ikanya Modimo bogolo go dilo tsotlhe.” Yo o boifang Modimo ga a boife batho. Yo o o ratang, o tla rata ba ga gabo. Yo o ikanyang Modimo o tla dira ka go ikanyega thata. Tumelo e ntse jalo. E na le maungo, e a kgona, e na le maikaelelo. Ijoo, tatlhego wee mo go rona, fa re leka go disa kwa ntle ga Modisa yo mogolo wa mewa ya rona! Ka moo, badisa, utlwang Lefoko la Morena le le reng: “‘Ruri! Ka botshelo jwa me! Dinku tsa me di fetogile thopo, dinku tsa me ke dijo tsa dibata tsotlhe tsa naga ka go tlhoka modisa; badisa ba me ga ba a ka ba tlhokomela dinku tsa me – kana badisa ba ne ba iphudisa fela, ba sa fudise letsomane la me. Ka moo he, lona badisa, utlwang Lefoko la MORENA!’ Morena Modimo o bua jaana, o a re: ‘Bonang, ke tla wela badisa bao, ke batla dinku tsa me mo diatleng tsa bone, mme bone ke tla ba ntsha mo tirong ya go disa dinku tsa me.’”

“Gonne Morena Modimo o bua jaana, o a re: ‘Bonang, ke tla batla dinku tsa me ka nosi, ke di tlamela. Modisa o tlhokomela letsomane la gagwe ka letsatsi le ka lone a leng mo gare ga dinku tsa gagwe tse di neng di phatlaletse, ke tla tlhokomela dinku tsa me jalo, ke di pholosa mo mafelong otlhe kwa di phatlalaletseng teng ka letsatsi la maru le lefifi. Ke tla di ntsha mo merafeng, ke di phutha mo mafatsheng, ke di isa kwa nageng ya tsona, ke di fudisa mo dithabeng tsa Iseraele le mo melapong le gotlhe fa di ka nnang teng mo lefatsheng leo. Ke tla di fudisa mo mafulong a a molemo; meraka ya tsona e tla nna mo dithabeng tse di godimo tsa Iseraele. Di tla botha teng mo marakeng a a molemo, di fula mafulo a manana mo dithabeng tsa Iseraele. Ke tla fudisa dinku tsa me ka nosi, ke di bothisa ka nosi, go bua Morena Modimo. ‘Ke tla batla tse di timetseng, ke busa tse di lelekilweng, ke fapa tse di robegileng, ke tiisa tse di lwalang, ke disa tse di akotseng le tse di tiileng, ke di fudisa ka tshwanelo.”

A re a di utlwa? MORENA a re: O tla dira tse tsotlhe tseo. Ke gore ga go tsamaye ka fa go lekeng ga rona, ga go tsamaye ka fa thatong ya rona, le e seng ka fa thateng ya rona. Mme a go lebogwe ene! Tsotlhe di tsamaya ka fa thatong ya MORENA. Morena wa letsomane ke ene fela. Wa romela Modisa yo o molemo mo gare ga rona, ke ene Morwawe yo o rategang Jesu Keresete. Fela jalo go kwadilwe mo go 1 Pet. 2:21 gore  “gonne lo bileditswe gona moo. Keresete le ene o bogisitswe ka ntlha ya lona, a lo tlogelela sekao gore lo gate motlhale wa gagwe.” Re a go leboga, Morena Keresete! O re tlhomogele pelo, Morena Keresete!”

Ka mafoko ao go a utlwala gore Modisa yo o molemo wa rona o laletsa makau a a reng: Ga a bone tiro, le fa a feditse sekolo sentle gore mangwe a nne teng a a tla yang mo seminareng go ipaakanyetsa go mo latela mo tirong ya gagwe ya go nna badisa mo letsomaneng la Modisa yo o molemo yo o neng a ineela mo losong ka ntlha ya rona. Ke yona taletso e kgolo ka Sontaga ya Modisa yo o molemo le mo ngwageng ono, mo sebakeng sa go tlhoka baruti mo mafelong a le mantsi mo kerekeng ya rona. Amen.

9.             Thapelo: Morena Modimo Rara, re a go leboga, gonne o re file Modisa yo o molemo wa rona Jesu Keresete. Morena, tshegofatsa badisa ba rona, o ba femele. O re fe borre le bomme ba ba ikanyegileng, ba ba go boifang, ba go itse, ba go sale morago gore re tsamaye sentle mmogo mo lefatsheng la rona, re utlwane sentle mo diphuthegong tsa rona, re tswelele sentle mo dikoleng tsa rona, re agisane sentle mo magaeng a rona, re thusanye mo tseleng ya go ya legodimong, re tlotlane mo tseleng, ka mebele le ka mewa ya rona re nne dikao tse dintle mo baneng ba rona, le fa re le baleofi, re itse, re gopole ka metlha  gore re gogiwa, re disiwa ke ene Jesu Keresete, Morena le Mopholosi wa rona, re se lebale go tsoseletsa basimane ba rona go ineela go ipaakanyetsa tiro ya go disa phuthego, rotlhe re kope ka metlha gore Morena a romele badiri mo thobong ya gagwe. Amen.

Thapelo ya Morena: Rara wa rona yo o mo legodimong …

10.          Sefela sa 216 – 201/209

A kagiso ya Modimo e e fetang tlhaloganyo yotlhe e boloke dipelo tsa rona le maikutlo a rona mo go Keresete Jesu, Morena, Morepholosi. Amen.

Thero eno e kwadilwe ke K. G. Tiedemann, ka ngwaga wa 2004

Kgatiso le go rongwa ga dithero tseo go tshegediwa ke kopano e e bidiwang The Lutheran Heritage Foundation.