Lutheran Church in Southern Africa

Dithero tsa Tirelano mo Kutlwanong

Thero ka letsatsi la go gopola papolo le loso lwa Morena, e le ka 22. 04. 2011                24/2011

Mo leineng la Modimo o e leng Rara le Morwa le Mowa o o Boitshepo!

 1.         Sefela sa 101 – 94/96

2.         Thapelo: “Kriste, Kwana ya Modimo, yo o ntshang lefatshe dibeng, re tlhomogele pelo! Kriste, Kwana ya Modimo, yo o ntshang lefatshe dibeng, re tlhomogele pelo! Kriste, Kwana ya Modimo, yo o ntshang lefatshe dibeng, o re fe kagiso!” Modimo, Rara yo o mo legodimong, re a leboga, ka o re neile Morwao Jesu Keresete gore ka ene go duelwe molato wa maleo a rona. Re a go leboga, le wena, Jesu Keresete, Morwa Modimo, yo o latlhilweng ka ntlha ya rona, ka o ne wa re swela mo sefapaanong. Morena, o re abele le kajeno Mowa o o Boitshepo wa gago gore fa re utlwa Lefoko la Efangele ya gago, re gogelwe mo tumelong, re bone botshelo jo bo sa khutleng ka loso lwa gago. Amen.

3.         Epistolo ka fa thulaganyong ya 2 e kwadilwe mo go 2 Bakorinthe  5:14b-21;

Efangele ka fa thulaganyong ya 1 e kwadilwe mo go Johane 19:16-30.

4.                                                                                                   A go ipolelwe tumelo ya bokeresete!             5. Sefela sa 98 – 91/110

6..              Thapelo ya mmadi wa thero.

7. Efangele ka fa thulaganyong ya 3 e kwadilwe mo go

Luka 23:33-49, e re: “E rile ba fitlha mo felong fa go bidiwang ‘Logata’, ba mmapolela teng le basenyi bao, mongwe ka fa letsogong le le jang, yo mongwe ka fa go la molema. Jesu a bua a re: ‘Rara, ba itshwarele; gonne ga ba itse se ba se dirang.’ Mme ba kgaogana diaparo tsa gagwe ka go tlhama tengwa. Batho ba eme ba lebile. Mme banna ba lekgotla le legolo ba nna ba mo kgoba ba re: ‘O pholositse ba bangwe, a a ipholose, fa e le ene Keresete, Motlhaolwi wa Modimo.’ Le batlhabani ba mo sotla, ba tla go ene, ba mo tsisetsa motatsa ba re: ‘Fa o le Kgosi ya Bajuta, ipholose.’ Mme ga bo go le sekwalo fa godimo ga gagwe, se se kwadilweng ka ditlhaka tsa Segerika le Seroma le Sehebera se re: ‘Yo ke Kgosi ya Bajuta.’ Mongwe wa basenyi ba ba pegilweng a mo kgala a re: ‘A ga o Keresete ne? Ipholose, le rona o re pholose.’ Yo mongwe a fetola, a mo kgalemela a re: ‘A le wena ga o boife Modimo, etswe o atlhotswe fela jaaka ene? Kana, fa e le rona, go re siametse; gonne re bona tse di tshwanetseng tse re di dirileng; mme yo, ene ga a dira sepe se se sokameng.’ A ba a raya Jesu a re: ‘Morena, o nkgopole motlhang o tsenang mo bogosing jwa gago.’ Jesu a mo raya a re: ‘Ammaaruri ke go raya ke re: Kajeno o tla nna le nna mo Parateiseng.’ Jaanong e ne e setse e ka nna nako ya motshegare; mme ga nna lefifi mo lefatsheng lotlhe go ya nakong ya boraro thapama, letsatsi la fifala; lesire la Tempele la gagoga ka bogare. Foo Jesu a goa ka lentswe le legolo a re: ‘Rara, ke neela mowa wa me mo diatleng tsa gago!’ Ya re a sena go bua jalo, a ntsha mowa. E rile molaodi-wa-lekgolo a bona se se dirafetseng, a galaletsa Modimo a re: ‘Ruri, motho yo e ne e le mosiami.’ Mme batho botlhe ba ba neng ba phuthegetse go bona pono e, ya re ba bona tse di dirafetseng, ba itshôla, ba boa. Botlhe ba ba itsanyeng nae, le basadi ba ba neng ba mo setse morago ba tswa Galelea, ba ne ba emetse kgakala, ba lebile dilo tseo.” Amen.

8. Thero: Phuthego e e rategang ya Morena wa rona Jesu Keresete, kajeno re gopola letsatsi la papolo le loso lwa Morena wa rona Jesu Keresete. Barategi mo Moreneng, re gopola kajeno gore go diragaditswe tse di builweng ke Modimo ka molomo wa baporofeti, re bona Jesu e tlhatlogela kwa Jerusalema mmogo le barutwa ba gagwe, a re: “Tsotlhe tse di kwadilweng ka ga Morwa Motho ke baporofeti di tla diragala, gonne o tla neelwa baheitane, a sotlwa, a direlwa maswe, a kgwelwa mathe. Ba tla mo seola, ba mmolaya. Mme o tla tsoga ka letsatsi la boraro.” Phuthego, Lefoko leo le ne le sa tlhaloganngwe ke barutwa ba ga Jesu, Lefoko leo la fitlhega mo go bone, ba ne ba sa tlhaloganye se ba se boleletsweng.

Bomorwa-Rre, go ntse jang kajeno mo go rona? A rona re tlhaloganya tse Lefoko la Modimo le di re bolelelang? A re tlhaloganya kgang e kgolo e e diragetseng ka Jesu? Phuthego, fa re leba, re a lemoga gore le kajeno go sa ntse go na le ba le bantsi ba ba sa di tlhaloganyeng, ba ba sa tlhaloganyeng tse re di diragaditsweng ke Jesu Keresete. A re lebeng mo go tsona tsa kwa re agileng teng. Ba bantsi ga ba na sepe le loso lwa ga Jesu, ba gopola fela gore ba bonye matsatsi a go ikhutsa mo tirong, ba bonye matsatsi a go lekolelana, a go nyadisa, a go dira ditiro tse di laolwang ka dingwao, le a go ja le go nwa.

Badumedi, a go se nne jalo mo go rona, mo go rona ba re itseng kgang e e kalo, e re e diretsweng ke Morena wa rona Jesu Keresete. A re kgobakaneng kajeno mo tirelong-Modimo, re felegetse Jesu mo tseleng ya gagwe ya go ya kwa Golegotha, re mo gopole, re mmone mo dipogong tsa gagwe, le mo losong lwa gagwe, re eme ka fa tlase ga sefapaano, re mmone yo o neng a bapolelwa mo sefapaanong ka ntlha ya maleo a rona.

Phuthego, ke re: Rotlhe re itse tiragalo ya dipogo le loso lwa Morena wa rona Jesu Keresete, jaaka e bolelwa mo diefangeleng di le nne, jaaka e bileng ya bolelwa mo Lefokong la Efangele ya thero ya rona ya kajeno. Ee, Jesu e rile a sena go latlhwa, le go atlholelwa loso, batlhabani ba Baroma ba ne ba mo kgarametsa, a ntse a belega sefapaano sa gagwe, a ya le sona mo felong fa go bidiwang “Logata”, kwa Golegotha gore ba mmapolele mo go sona. Efangele e re: “E rile ba fitlha mo felong fa go bidiwang “Logata”, ba mmapolela teng le basenyi bao, mongwe ka fa letsogong le le jang, yo mongwe ka fa go la molema.”

Phuthego, re bona Morena Jesu a lepelega fa gare ga basenyi le dinokwane, o ka re jaaka senokwane se segolo, mme ene o ne a sa dira sepe se se bosula, mme a sikara tsotlhe tseo ka ntlha ya bosula jwa rona, ee, ke fa go diragetse tse di boletsweng ke Modimo ka molomo wa moporofeti, le ka seatla sa gagwe, tse di reng: “A otlwa mo go isang losong ka ntlha ya boikepo jwa morafe wa me. Ba ne ba mo naya lebitla mo baikeping, le fa a sa dira tshiamololo epe; le fa go se tsietso mo molomong wa gagwe; mme ya re a swa, a nna le mohumi,” Jes. 53:8b-9.

Phuthego, a re lebeng. Jesu ke yoo, a lepelega mo sefapaanong, madi a gagwe a tswa mo diatleng, mo dinaong, mo tlhogong, mo mmeleng otlhe wa gagwe, o tletse dintho. Tse tsotlhe tseo o ineetse mo go tsona gore a diragatse thato ya ga Rraagwe, re mo utlwa a rapelela dira le babolayi ba gagwe, a re: “Rara, ba itshwarele, gonne ga ba itse se ba se dirang!” Ke nnete batho bale, ba ne ba sa itse se ba se dirileng, le e seng go itse gore ba bapotse Morwa Modimo, ba latlha Modimo ka nosi, ba bapotse Morena, Mopholosi wa bone.

Phuthego, Jesu ke yoo, a lepelega mo sefapaanong, a boga botlhoko le khutso ka ntlha ya rona! Go setse fela gore go goroge loso, batho ba eme, ba leba tsotlhe tseo di diragetseng. Fela jalo le baperesiti ba bagolo le bagolwane ba tswa kwa Jerusalema, ba ya kwa Golegotha gore ba itumedisediwe ka gore mmaba wa bone a bolawe tota. Re a ba utlwa ba sotla Jesu, ga twe: “Banna ba lekgotla le legolo ba nna ba mo kgoba, ba re: ‘O pholositse ba bangwe, a a ipholose, fa e le ene Keresete, Motlhaolwi wa Modimo.’” Le batlhabani ba ba mmapotseng ba mo sotla ba re: O Kgosi ya Bajuta. Ipholose! Fela jalo mongwe wa basenyi ba ba neng ba bapolwa mmogo le Jesu, le ene a kgala Jesu, a re: “A ga o Keresete ne? Ipholose, le rona o re pholose.” Phuthego, re a bona gore baba botlhe ba ga Jesu ba ne ba kgobakanela kwa Golegotha gore dipogo tsa gagwe di okediwe, mme mo go ene yo o neng a tlhabolegela mo go ene, Jesu o ne a mmolelela, a re:”Ammaaruri ke go raya ke re: Kajeno o tla nna le nna mo Parateiseng.”

Phuthego, ka ura ya lesome le bobedi motshegare ga diragala kgakgamatso, letsatsi la fifala, ga nna lefifi mo lefatsheng lotlhe go ya nakong ya boraro thapama. Ka nako eo ya diura tse tharo go ne go le lefifi le mo pelong ya ga Jesu. Letsatsi le lona le ne le sa rate go bona se se botlhoko sele se se diragaletseng Morwa Modimo.

Fela jalo lesire la Tempele la gagoga ka bogare. Barategi, lesire le setse le tlositswe ka loso le tsogo ya ga Jesu. Tirelo-Modimo ya Testamente e kgologolo e setse e dirafaditswe. Jesu o setse a tsenye mo felong ga boitshepo jwa maitshepo ga legodimo, e seng ka madi a ditshedi, mme ka madi a gagwe. Barategi, rotlhe re na le tshiamelo ya go atamela mo Modimong ka ntlha ya ga Jesu.

“Rara, ke neela mowa wa me mo diatleng tsa gago!” Jesu a goa jalo ka Lefoko le legolo. “Ya re a sena go bua jalo, a swa.” “Rara, mo diatleng tsa gago ke neela mowa wa me.” Phuthego, mafoko ao a supa phenyo, mafoko ao a builwe ke Seganka se se fentseng. Mafoko ao a builwe ke Morwa Modimo, a neela mowa wa gagwe mo diatleng tsa ga Rraagwe, a sena go diragatsa thato ya ga Rraagwe, a swa gore rona re se swe, re tshele, re itshwarelwe maleo, re pholosiwe, re nne le botshelo jo bo sa khutleng mo go ene mo legodimong.

A Modimo, Rara yo o mo legodimong, a re thuse rona ba re phuthegetseng mo tirelong eno ya Modimo kajeno, a re abele Mowa o o Boitshepo wa gagwe, re bone, re dumele tse re di baakanyeditsweng ke Jesu ka dipogo le loso lwa gagwe, gape re di fetisetse mo go ba bangwe ba ba sa ntseng ba le mo lefifing gore le bone ba utlwe gore Jesu ke Mopholosi wa batho botlhe, ke Mogolodi wa bone botlhe, ka a sikare maleo a batho botlhe, a sikare le a bone, a swela botlhe, a swela le bone. Fa ba tlhabologa mo maleong, ka go tlhabologela mo go ene, le go dumela mo go ene, le go kolobediwa mo leineng la gagwe, le bone ba pholosiwe, ba nne le botshelo jo bo sa khutleng jaanong le mo legodimong. Ke ona molaetsa o re o utlwang kajeno ka letsatsi la go gopola papolo le loso lwa Morena. Ke molaetsa wa thuano le tetlano le Modimo ka loso le tsogo ya ga Morwaaona Jesu Keresete. A go lebogwe Mopholosi yo wa rona, jaanong, le ka bosakhutleng. Amen.

9.         Thapelo: Morena, Modimo, Rara yo o mo legodimong, re a leboga, re lebogela Lefoko le le boitshepo la gago le re tswang go le utlwa kajeno. Re a leboga, ka o neetse Morwao yo o tsetsweng a le esi mo losong ka ntlha ya maleo a rona, re a go leboga, wena Jesu Keresete, Kwana ya Modimo yo o sikareng maleo a lefatshe, ka o diragaditse tiro e kgolo ya go re pholosa, o re abele le kajeno Mowa o o Boitshepo wa gago gore re atamele sešwa mo sefapaanong sa gago, re amogele tse re di diretsweng ke wena ka dipogo le loso lwa gago, re di amogele ka tumelo, re pholoswe ka thata ya loso le tsogo ya gago. Amen.

Thapelo ya Morena: Rara wa rona yo o mo legodimong …

10.       Sefela sa 128 – 116/121

A kagiso ya Modimo e e fetang tlhaloganyo yotlhe e boloke dipelo tsa rona le maikutlo a rona mo go Keresete Jesu, Morena, Morepholosi. Amen.

Thero eno e kwadilwe ke F. J. Mtshali, ka ngwaga wa 2004

Kgatiso le go rongwa ga dithero tseo go tshegediwa ke kopano e e bidiwang The Lutheran Heritage Foundation.